လွယ်လိုက်ပုံများ

ကိုကိုခန့်ချော(ကသာမြေ)

        စိမ်းပန်းပြာရွာမှ ဦးဖိုးဆောင်းသည် စကားပြောရာ၌ အချက်ကျကျနှင့် ကန့်လန့်တိုက်ပြောတတ်သဖြင့် ရွာသားများက သူနှင့်စကားပြောရန် လွန်စွာဝန်လေးကြသည်။ ဦးဖိုးဆောင်း၏ဇနီး ဒေါ်ငြိမ်းပင်လျှင် မပြောမဖြစ်မှသာ ပြောလေ့ရှိသည်။ တစ်နေ့တွင် ဒေါ်ငြိမ်းက ဦးဖိုးဆောင်းအား -

        ‘‘ဒီည ၇ နာရီ ရွာဦးကျောင်းမှာ တရားပွဲရှိတယ်။ ရှင်လိုက်ဦးမှာလား’’

        ‘‘မင်းတို့သာ သွားကြတော့ကွာ။ တရားပွဲသွားတယ်ဆိုတာ တရားမရသေးတဲ့သူတွေသာ သွားကြတာကွ’’

        ‘‘ဒါဆိုရင် ရှင်က တရားရပြီးဟုတ်လား။ ဘယ်တုန်းက ရလိုက်တာလဲ’’

        ဒေါ်ငြိမ်း၏အမေးက ဦးဖိုးဆောင်းက ဖြေလိုက်သည်မှာ -

        ‘‘ကားနဲ့လှည့်ပြီး တရားခွေလာရောင်းတုန်းက ဝယ်ထားလိုက်တာလေ’’

ဒို့ကျေးရွာဂျာနယ် အတွဲ (၁၅) အမှတ် (၈)